《弄堂》：
三点钟横里，丁丁蹿到酒家里头看白相。人家八个人坐辣一筑堆轧勿进，看见老头子故面搭蛮空，一家头坐只八仙桌来吃，伊眼乌珠的骨轮圆，跑过去转发转发。
老头子屋里真叫拆人家，一家门只挺伊告老太婆两家头。看见丁丁鼻头塌塌，眼睛小小个，蛮活络，蛮噱头，有点像伊老早仔一个侄子，手招招，叫伊过来坐好，只熏蛋夹开来，拨伊吃半只。
熏蛋也要一角洋钿唻，勿是随随便便好买个，丁丁一口头下去末，当老头子好朋友唻。
两家头侬一句我一句，讲到哪能做弹皮弓。丁丁只会得做简单个，树浪，一根丫枝拗下来，高头橡皮筋绕根。老头子教伊做个工艺高来，丫又是铜条拗成功个，外头包个是电线皮，用个是牛皮筋，牛皮筋当中再穿块长方形轮胎橡皮，劲道大了麻雀也好弹。
丁丁一听麻雀，眼眼玻璃柜台里头，白瓷盆浪向个酱麻雀，兴头一枪头吊上来，嬲牢仔老头子，勿算要手把手教伊做，根牛筋做个牛皮筋也要包脱。老头子存心勿答应先，等到丁丁极出乌拉，拉牢伊，“阿爷阿爷”穷叫，乃末哈哈笑笑答应哉。
弹皮弓做好，丁丁转去路浪，手痒来，摸出来试试准头看，小石头弹过去，弹辣人家门牌号浪，一块搪瓷落下来。闯仔祸，有眼吓丝丝，豪燥屋里迓迓进。弹皮弓园辣枕头下头。
小朋友到底是小朋友，熬到夜饭吃好，伊又熬勿牢了，想想天也夜了，再出去练练枪头，终呒没人看见了。东弹一记，西弹一记，伊也勿觉着啥，弹好转来了末，床浪一倒，睏着寤。
第二日天，出大事体睐。宣传画浪，着仔绿军装大招手个领袖，一只眼乌珠弹脱睐。
“里革会”马上报案，吉普卡也开得来。揂发揂发，揂藤揂到丁丁。丁丁吓了面孔煞白，越吓，嘴巴倒越老，一口头咬定勿晓得。“我告毛主席保证，勿是我弹个！弹皮弓也是我今朝早浪向，弄堂里头拾得来个！作兴是台湾特务虱脱个！”
犯罪对象年纪忒小，再讲也呒啥证据，顶要紧是革命革了辰光忒长，大家侪有点疲脱了。弹皮弓末，专案组没收脱了，叫家长加强教育。“里革会”两个主任阿姨思想觉悟高，露天电影看歇过《列宁在1918》，是定坚要查出真凶，为领袖报仇。
揂下去末，揂到酒家，摸瓜摸着老头子了。丁丁迭个一枪是，日日望里头跑，像煞告老头子蛮有数。
酒家里头老师傅一口回头脱，讲老头子坐辣角角落里，远开柜台八只脚唻，伊讲啥，阿拉听得出个说话，迭个勿是乱话三千。
两个老酒鬼也拨主任阿姨吃记弹皮弓，讲老酒吃了忒多，木知木觉当中，革命警惕性勿高，对勿住。铁证呒没末，“里革会”也有办法弄松侬，关照老头子，下趟勿许出门吃老酒，要是看见了，就算自绝于人民。作孽，老头子告老太婆勿是天仙配，是地仙配，一个末，欢喜小老酒渳渳个，一个末，断命酒精过敏个，勿要讲吃一口酒，就是酒味道浓仔眼，面孔浪，马上一粒一粒出痧子能介。
两家头轧辣二层阁里头，块门板拉上仔，迓也迓勿脱呀，实实叫，是呒没办法吃。
灶披间也勿好去，一个主任阿姨个眼线，绰号叫电母，就蹲辣后厢房。唉，勿吃是熬勿牢个，屋里吃也是勿局个，还是要外头吃。
想来想去，独有一只。来末，来外头，两个主任阿姨踏末，又踏勿进，就是隔壁弄堂口一只射尿坑。
老头子拎只人造革“航空”包，用只装沙药水个瓶头，跑到酱油店拷眼料酒，买盒苏州豆腐干，进去仔。纽子洞豪燥解好先，前门敞开，飞机乘上，一头吃，一头听。脚步声一听见，有人跑过来了，豪燥药水瓶包里塞好，卖力屏两沰尿出来。
……
展开
